काठमाडौं – प्रधानमन्त्री पुष्पकमल दाहाल ‘प्रचण्ड’ले संविधान संशोधनको नाममा राष्ट्रलाई द्वन्द्वतिर लैजाने दुस्साहस नगर्न चेतावनी दिएका छन् । आजको प्रतिनिधिसभा बैठकमा विश्वासको मत माग्दै उनले नेपाली कांग्रेस र नेकपा एमालेलाई यस्तो चेतावनी दिएका हुन् ।

“सहमति नाघेर छलछाममा लागेर संविधान संशोधनका नाममा राष्ट्रलाई द्वन्द्वतिर लैजाने दुस्साहस नगर्नु होला,” उनले भने ।

उनले विस्तृत शान्ति सम्झौतामा हस्ताक्षर पनि साक्षी राखेर गरिएको बताए । प्रचण्डले दुई दललाई कसैले मिलाएको पनि दाबी गरे । “तपाईंहरूलाई कसैले मिलाएको हो । किन मिलाएको हो । घाम जत्तिकै प्रष्ट छ । झुटमा राष्ट्रिय सहमतिको बर्को ओड्नुभएको छ,” उनले भने ।