एजेन्सी, भाद्र ७ – रुसी राष्ट्रपति भ्लादिमिर पुटिनविरुद्ध विद्रोह गरेका येभगेनी प्रिगोगिनको बुधवार राति भएको विमान दुर्घटनामा मृत्यु भएको थियो । उनी निजी सेना वाग्नर समूहका प्रमुख थिए । उनको समुहले भाडामा सैनिक परिचालन गर्ने गर्दथ्यो र ति सेनाहरु युक्रेन युद्धमा समावेश हुने गर्दथे । समाचार एजेन्सी रोयटर्सले रुसको एजेन्सी टासलाई उद्धृत गर्दै यो खबर दिएको हो । दुर्घटनामा थप १० जनाको मृत्यु भएको बताइएको छ ।

जानकारी अनुसार यो दुर्घटना बुधवार दिउँसो मस्कोको उत्तरी क्षेत्रमा भएको हो । रुसको नागरिक उड्डयन प्राधिकरणले येभगेनीको नाम यात्रु सूचीमा समावेश भएको मात्रै जानकारी दिएको छ । यो एम्बरर विमान मस्कोबाट सेन्ट पिटर्सबर्ग जाँदै थियो ।

प्रिगोगिनले जुनमा पुटिनविरुद्ध विद्रोह गरेका थिए र त्यसपछि उनी कथित रूपमा बेलारुस गएका थिए । त्यसैले उनी कहिले र कसरी रुस पुगे भन्ने खुलाइएको छैन । एक रुसी अधिकारीले स्काई न्युजलाई भने, ‘हामीले दुर्घटनाको अनुसन्धान सुरु गरेका छौँ । दुई दिनअघि प्रिगोगिनको पहिलो भिडियो सार्वजनिक भएको थियो ।’

सामाजिक सञ्जालमा दुर्घटनाका केही भिडियोहरू छन्, यद्यपि यसको प्रामाणिकता पुष्टि हुन बाँकी छ ।