काठमाडौं, साउन २२ – नेपाल नर्सिङ काउन्सिलले लाइसेन्स परीक्षाको प्रश्नपत्र आउट गरेको घटनामा संलग्न ५७ जनालाई गरेको छ । प्रहरीको प्रतिवेदनलाई आधारमा मान्दै काउन्सिलले ती विद्यार्थीलाई कारबाही गरेको हो ।

कारबाही गरिएकामध्ये ५० जनाको परीक्षा नतिजा स्थगित गरिएको छ भने सातजनालाई तीन वर्षसम्म नर्सको लाइसेन्स परीक्षामा सामेल हुन नपाउने निर्णय गरिएको काउन्सिलले जनाएको छ । तीनवर्षे कारबाही गरिएका सातजना प्रश्नपत्र आउट गर्ने कार्यमा संलग्न भएको पाइएको छ । तीमध्ये चारजना अझै फरार छन् ।
असार २३ गतेको लाइसेन्स परीक्षा चलिरहेका बेला अलब्राइट इन्स्टिच्युटको म्यासेन्जर ग्रुपमा प्रश्नपत्र पठाइएको र सो म्यासेज केही समयमै ४०० भन्दा बढी व्यक्तिले ‘सिन’ गरेको पाइएको काउन्सिलकी अध्यक्ष सरला केसीले बताइन् ।

सोही दिन बालाजुस्थित सिद्धार्थ वनस्थली इन्स्टिच्युट, ललितपुरस्थित लिटिल एन्जल्स स्कुल र वाग्मती कलेज काठमाडौं केन्द्रबाट प्रश्नपत्र बाहिरिएको थियो । सो दिनको परीक्षा नतिजा काउन्सिलले एक महिना स्थगित गरी आइतबार मात्र सार्वजनिक गरेको थियो ।